नवनिर्वाचित प्रतिनिधिसभा सदस्यले आज २ बजे पद तथा गोपनीयताको शपथ लिने

काठमाडौँ ।

नवनिर्वाचित प्रतिनिधिसभा सदस्यहरूको पद तथा गोपनीयताको शपथ आज अपराह्न २ बजे हुँदैछ। शपथ समारोहका लागि आवश्यक सम्पूर्ण तयारी पूरा भइसकेको सङ्घीय संसद् सचिवालयले जनाएको छ।

शपथ अर्जुननरसिंह केसीले गराउनेछन्, जो प्रतिनिधिसभाका ज्येष्ठ सदस्य हुन्। सचिवालयका प्रवक्ता एकराम गिरीका अनुसार कार्यक्रमको सबै व्यवस्थापन पूरा भइसकेको छ। यसअघि रामचन्द्र पौडेलले केसीलाई ज्येष्ठ सदस्यका रूपमा शपथ गराएका थिए।

सिंहदरबारस्थित नवनिर्मित बहुउद्देश्यीय हलमा हुने उक्त समारोहमा ४७ जना सांसदले नेपालीबाहेक अन्य भाषामा शपथ लिने तयारी गरेका छन्, जसमध्ये १७ जनाले मैथिली भाषामा शपथ लिनेछन्।

नेपालको संविधानको धारा ९९ तथा धारा ९१ को उपधारा (५) र प्रतिनिधिसभा सदस्य निर्वाचन ऐन, २०७४ को दफा ७५ अनुसार शपथ ग्रहणको व्यवस्था गरिएको हो।

साम्सदलाई नागरिकता, निर्वाचन आयोगको प्रमाणपत्र सहित निर्धारित समयभन्दा दुई घण्टा अघि उपस्थित हुन आग्रह गरेको छ। साथै, औपचारिक वा सांस्कृतिक पहिचान झल्किने पोसाकमा उपस्थित हुन पनि अनुरोध गरेको छ।

यसका लागि सभामुख आसन, रोष्ट्रम, बैठक व्यवस्था लगायत सबै प्राविधिक र भौतिक तयारी पूरा गरिएको सचिवालयले जनाएको छ।

गत फागुन २१ गते सम्पन्न निर्वाचनमा राष्ट्रिय स्वतन्त्र पार्टीले १८२ सिट जित्दै अग्रता लिएको छ भने नेपाली कांग्रेसले ३८, नेकपा एमालेले २५, नेपाल कम्युनिस्ट पार्टीले १७, श्रम संस्कृति पार्टीले ७ र राष्ट्रिय प्रजातन्त्र पार्टीले ५ सिट प्राप्त गरेका छन्।