विपद् जोखिम न्यूनीकरण गर्न सरोकारवालाबीच सहकार्य आवश्यक- गृहमन्त्री अर्याल

काठमाडौं ।

गृहमन्त्री ओमप्रकाश अर्यालले विपद् जोखिम न्यूनीकरण तथा व्यवस्थापन गर्न सबै सरोकारवालाबीचको सहकार्य बढाउनुपर्ने बताउनुभएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणमा कुरा गर्दै गृहमन्त्री अर्यालले विपद् व्यवस्थापनका लागि सरकार र नागरिकका साथसाथै सामुदायिक एवं व्यवसायिक संस्थाहरुबीच समझदारी विकास हुनुपर्ने धारणा राख्नुभएको हो।

विपद् जोखिम न्यूनीकरण तथा व्यवस्थापन कार्यकारी समितिका अध्यक्षसमेत रहनुभएका मन्त्री अर्यालले विपद् जोखिम न्यूनीकरण तथा व्यवस्थापन ऐनको स्पिरिटअनुसार काम हुनुपर्ने उल्लेख गर्दै विपद् जोखिम व्यवस्थापनमा गरिएको निर्देशनको पूर्ण पालना हुनुपर्ने बताउनुभयो।

शुक्रबारदेखि भइरहेको भारी वर्षाका कारण हालसम्म मानवीय क्षति नभएको र त्यस्तो क्षति शुन्य नै होस् भन्ने हिसाबले सरकारले काम गरिरहेको बताउँदै उहाँले त्यसमा कमी कमजोरी नहोस् भन्ने ढंगले निर्देशन गरिएको पनि जानकारी दिनुभयो।

गृहमन्त्री अर्यालले विपद्का बेला आर्थिक उपार्जनको मौका हो भनेर फाइदा उठाउने तत्वहरुलाई कडा रुपमा निगरानी गर्न मातहतका संयन्त्रलाई निर्देशन पनि दिनुभयो। सुशासनको विषयवस्तु विपद्का बेला अझ महत्वपूर्ण हुने मन्त्री अर्यालको धारणा छ।