लागूऔषध सहित स्याङ्जाबाट दुई जना पक्राउ
Sabalnews
प्रकाशित मिति :
सोमबार, भाद्र ९ २०८२
पाल्पा ।
सिद्धार्थ राजमार्ग अन्तर्गत स्याङ्जाको गल्याङ नगरपालिका १ राम्दीबाट प्रहरीले लागूऔषध सहित दुई जनालाई पक्राउ गरेको छ । पोखरा महानगरपालिका ९ पृथ्वीचोक कास्की बस्ने २३ वर्षीय साजन ठकुरी र सोही ठाउँ बस्ने २२ वर्षीय अर्जुन गुरुङलाई सोमबार नियन्त्रणमा लिएको हो ।
उनीहरुको साथबाट प्रहरीले डाइजेपाम ३६ एम्पुल, नुफिन ३७ एम्पुल, फेनेरागन ३७ एम्पुल गरी जम्मा ११० एम्पुल लागुऔषध बरामद गरेको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्नराज चौधरीले जानकारी दिनुभयो ।
वडा प्रहरी कार्यालय वालिङ र अस्थायी प्रहरी चौकी राम्दीबाट खटिएको प्रहरी टोलीले सवारी साधनहरु चेकजाँच गर्ने क्रममा बुटवलबाट पोखरातर्फ जाँदै गरेको लु १ ख ५४५१ नम्बरको यात्रुवाहक बसमा सवार उनीहरुको साथबाट लागु औषध सहित नियन्त्रणमा लिएको हो । प्रहरीले यस सम्बन्धमा थप अनुसन्धान अघि बढाएको प्रहरीले जनाएको छ ।
