आज हरिबोधनी एकादशी, कालीगण्डकी नदी घाटमा मेला

Sabalnews प्रकाशित मिति : मंगलबार, कार्तिक २७ २०८१

743

आज कार्तिक शुक्ल एकादशी अर्थात ठुला एकादशी/हरिबोधनी एकादशी । आज नेपालका विभिन्न स्थानमा मेला लाग्ने गर्दछ । हिन्दू धर्मावलम्बीहरुले भगवान् विष्णुको प्रतिकका रुपमा आज पुजा गर्दछ्न् । भगवान् बिष्णुको महिमामा शालिग्राम शिला पाइने कालीगण्डकी नदी किनारका दर्जनौ स्थलमा आज भव्य मेला लाग्दछ । आज तुलसीको पुजाआजा गरि।विवाह गरिदिने प्रचलन छ । असार शुक्ल एकादशीमा रोपिएको तुलसीको आज बिहे गरिदिने परम्परा हो ।

हरिशयनीदेखि हरिबोधिनी एकादशीका दिनसम्म चार महिना विष्णुभक्तहरुले तुलसीको व्रत गरी पूजा गर्दछन् । तुलसी वैज्ञानिक रूपमा पनि अत्यन्त लाभदायक बनस्पती मानिन्छ । तुलसीको सुगन्धले दश दिशा पवित्र हुने धार्मिक मान्यता रहेको छ । तुलसीको पात, डाँठ वा फूलको रस रुघाखोकी र औलोलगायत रोगका लागि औषधिको रुपमा पनि प्रयोग गरिन्छ ।

आजको दिन अन्न खान नहुने भएकाले सखरखण्ड, पिँडालु र वनतरुल उसिनेर फलाहार गरिन्छ । यसरी ब्रत गरेमा पापको नाश भई पूण्य वृद्धि हुने र मोक्ष प्राप्ति हुन्छ भन्ने धार्मिक विश्वास छ । ठूलो एकादशी पनि भनिने आजको एकादशी ब्रतले हजार अश्वमेध यज्ञ तथा राजसूर्य यज्ञ गरे बराबरको फल पाइने शास्त्रीय मान्यता छ । कात्तिक महिनामा भगवान् विष्णुलाई भक्तिपूर्वक सम्झी गरिएको स्नान, दान, जप र होमले फल पाइने एवं सय जन्मका पापबाट मुक्ति मिल्ने प्रसङ्ग शास्त्रमा वर्णन गरिएको छ ।

एकादशीमा स्नान गर्नेहरुको आज गण्डकी वेशी क्षेत्र भएर बग्ने पवित्र कालीगण्डकीको विभिन्न घाटहरुमा बाक्लो उपस्थिति रहन्छ । भक्तजनहरु विहानै देखि नदी किनार पुग्ने गर्दछन् । साथै रिडी, राम्दी, हुँगी, भुजात, तातोपानी, ज्याग्दी, केलादी, बालीघाट, देवघाट लगाएतका विभिन्न स्थानमा विशेष मेला पनि लाग्ने गर्दछ । आजै देशभरका नारायण स्थान र मन्दिरमा विशेष पूजा गरी यो पर्व मनाइन्छ ।

प्रतिकृया दिनुहोस