पहिरोले पुरिएर ज्यान गुमाएका डोजर चालक खड्काको परिवारलाई नगरपालिकाको सहयोग

पाल्पा ।

रामपुर १० मा मोटरबाटो ममर्तको क्रममा ज्यान गुमाउन पुगेका डोजर चालक धनविर खड्काको परिवारलाई रामपुर नगरपालिकाले आर्थिक सहयोग गरेको छ ।

गत असोज २२ गते बाटो मर्मत गर्ने क्रममा पहिरोले डोजर पुरिएर ज्यान गुमाएका दाङ शान्तिनगरका धनविर खड्काको श्रीमतीलाई नगद १ लाख रुपैयाँ नगरपालिकाले हस्तान्तरण गरेको हो । रामपुर नगरपालिका वडा नं.१० को टोक्से पलेङ मोटरबाटो मर्मतको क्रममा पहिरोले डोजर पुरिदा रामपुर १० देउरालीमा रहेर डोजर चलाउदै आएका ३० बर्षिय खड्काको ज्यान गएको थियो । बर्दले जाने भित्री सडक मर्मत गर्ने क्रममा माथिबाट खसेको सुख्खा पहिरोले बा २ क १९५७ नम्बर जेसीबी डोजर पुरिएको हो ।

दाङ शान्तीनगर गाँउपालिका वडा नं.१ नयाँबस्तीका खड्काकी श्रीमती पवित्रा खड्कालाई रामपुर नगरपालिकाका नगर प्रमुख रमण बहादुर थापा, उपप्रमुख बालकुमारी थापा, प्रमुख प्रशासकीय अधिकृत सुर्यदर्शन पण्डितले एक लाख रुपैयाँ बराबरको चेक हस्तान्तरण गर्नुभयो ।
नगरपालिका भित्रको सडक मर्मतको क्रममा ज्यान गुमाएकोमा दुख व्यक्त गर्दै रामपुर नगरपालिकाले खड्का परिवारलाई राहत र छोराछोरीको भविश्यको लागि आर्थिक सहयोग गरेको नगरप्रमुख रमण बहादुर थापाले बताउनुभयो ।