निस्दीमा पालिका स्तरीय बाल भेला तथा पहिलो अधिवेशन सकियो
होम राई मगर
प्रकाशित मिति :
शुक्रबार, माघ २० २०७९
पाल्पा ।
निस्दी गाउँपालिका पाल्पामा पालिका स्तरीय बाल भेला तथा प्रथम अधिवेशन सम्पन्न भएको छ ।
लुम्बिनी प्रदेश सदस्य राजु प्रसाद श्रेष्ठले भेला उद्घाटन गर्दै बालबालिकाहरुको अधिकार संरक्षणमा अभिभावकहरुको भूमिका महत्त्वपूर्ण रहने भएकोले बालमैत्री वातावरणको सिर्जना घरपरिवारले गर्नुपर्ने बताउनुभयो । उहाँले राज्यका तीनै तहका सरकारबाट उपयुक्त योजना तथा कार्यक्रममा मार्फत बालबालिकालाई सम्बोधन गर्नुपर्नेमा जोड दिनुभएको थियो ।
कार्यक्रममा रम्भा गाउँपालिकाका अध्यक्ष विष्णु भण्डारीले रम्भा गाउँपालिकामा यस अघि बालमैत्री कार्यक्रम सन्चालन गरेको र योजना तथा कार्यक्रम अनुरुप सफल तथा प्रभावकारी रहेको बताउनुभयो । निस्दी गाउँपालिकाका अध्यक्ष मुक्त बहादुर सारुले हाल निस्दीमा बाल बिबाह मुख्य समस्या र चुनौती रहेको बताउनुभयो । उहाँले यस बारे गाउँपालिकाले प्राथमिकताका साथ योजना तथा कार्यक्रमहरु ल्याउने बताउनुभयो । साथै, सम्बन्धित सरोकारवालाहरुको साथ र सहयोग समेत रहनेमा आफु विश्वस्त रहेको उल्लेख गर्नुभयो ।
कार्यक्रममा विभिन्न राजनैतिक दल,संघ,संस्थाका प्रमुख तथा प्रतिनिधिहरु र ७ वटै वडाका बालबालिकाहरुको उपस्थिति रहेको थियो ।
माघ १९ गते र २० गते २ दिन सम्म चलेको भेलाले जेनिसा सोतीको अध्यक्षतामा ११ सदस्यीय पालिका स्तरीय बाल मन्च गठन गरेको छ । जसको उपाध्यक्षमा निलम ढकाल,सचिबमा नबिन बयम्बु,सहसचिवमा मनिषा जर्घा र कोषाध्यक्षमा निरुता फाल चयन भएका छन् । यसैगरी सदस्यहरुमा हिमेश मश्राङ्गी, शान्ति राई, विष्णु नेपाली, रोशन नेपाली, नबिन्द्र सुनारी र निशा सारु रहेका छन् ।
