अबैध उत्खनन् देखि राजमार्गको कडाईमा बेलचौतारा प्रहरी

तनहुँ ।

इलाका प्रहरी कार्यालय बेलचौताराले बिगतको तुलनामा गत डेढ महिना यता अबैध उत्खननमा संलग्न सवारी साधनलाई नियन्त्रणमा लिएको छ ।

आर्थिक बर्षको शुरुवात साउन देखि गत चैत्र सम्म भन्दा गत डेढ महिनामा अबैध उत्खननमा संलग्न धेरै सवारी साधन नियन्त्रणमा लिएको इलाका प्रहरी कार्यालय बेलचौताराले जनाएको छ । आर्थिक बर्ष शुरु देखि चैतसम्मको ९ महिनामा १४ वटा बिभिन्न सवारी साधन नियन्त्रणमा लिएकोमा गत बैशाख र जेठको डेढ महिनामा अबैध उत्खननमा संलग्न त्यस्ता २० वटा सवारी साधनलाई नियन्त्रणमा लिन सफल भएको इलाका प्रहरी कार्यालय बेलचौताराका प्रहरी निरिक्षक भोजराज पाण्डेले जानकारी दिनुभयो ।

बिशेष गरी तनहुँका बेलचौतारा आसपासका खोला किनारमा अबैध उत्खननमा संलग्न एक्साभेटर १, जेसिवि ३, टिप्पर ६, ट्याक्टर १० वटा गरी २० सवारी साधन नियन्त्रणमा लिएर १ लाख ९६ हजार रुपँया कारबाही तथा राजस्व संकलन गरेको छ ।
यस आर्थिक बर्षमा कुल ३४ वटा त्यस्ता सवारी साधनलाई नियन्त्रणबाट ४ लाख १६ हजार राजस्व संकलन भएको छ ।
गत बैशाख २ गते ललितपुरबाट सरुवा भई इलाका प्रहरी कार्यालय बेलचौतारामा आउनुभएका प्रहरी निरिक्षक भोजराज पाण्डेले शान्ति सुरक्षा र चेकजाचलाई कडाई गर्दै लगेपछि चोरी निकासी तथा अबैध क्रियाकलापमा संलग्नहरु नियन्त्रणमा आएका हुन् भने राजस्व पनि बृद्धि भएको छ । पोखरा- काठमाडौं सडकखण्डमा पर्ने बेलचौतारा प्रहरीले राजमार्गमा चल्ने सवारी साधन तथा यात्रुलाई सुरक्षित यात्राको लागि निगरानी बढाएको छ भने चालकलाई सम्झाउने गरेको छ ।

इलाका प्रहरी कार्यालय बेलचौताराले आर्थिक वर्ष २०७७/ ०७८ मा लागुऔषध मुद्धा २ वटा दर्ता गरेको थियो । यस आर्थिक बर्षमा बैशाख यता मात्रै लागुऔषधका ५ मुद्धा दर्ता भई अनुसन्धान चलिरहेको छ ।