स्याङ्जा स्रष्टा सदनको अगुवाईमा यति एयरलाइन्सको टिकटमा कलाकारलाई छुट
Sabalnews
प्रकाशित मिति :
मंगलबार, कार्तिक २० २०८१
पोखरा ।
स्याङ्जा स्रष्टा सदनको अगुवाईमा यति एयरलाइन्सको समन्वयमा देशभरका कलाकारलाई यतिको उडानमा विशेष छुट दिने सम्झौता भएको छ ।
स्याङ्जा स्रष्टा सदनका महासचिव घनश्याम रिजालको पहलमा नेपालको हवाइ सेवा प्रदायक कम्पनी यति एयरलाइन्स संगको समन्वयमा मंगलबार यो सम्झौता भएको हो ।
यति एयरलाइन्स र स्याङ्जा स्रष्टा सदन बिच कलाकारहरुलाई विशेष छुट सहित हवाइ टिकट उपलब्ध गराउने सम्बन्धमा सम्झौता भएको हो महासचिव रिजालले भन्नुभयो । यति एयरलाइन्स पोखराका स्टेसन म्यानेजर राम लामिछाने र स्याङ्जा स्रष्टा सदनका अध्यक्ष पशुपति शर्मा बिच मंगलबार सम्झौता पत्रमा हस्ताक्षर भएको छ ।
यो सम्झौता स्याङ्जा स्रष्टा सदनको अगुवाइमा भएपनि देशका सबै कलाकारहरुले यो विशेष सुबिधा उपयोग गर्न पाउने यति एयरले जनाएको छ ।
यो सुबिधा लिनका लागि यति एयरलाइन्सको मोबाइल एप लग इन र आफ्नो मोबाइल नम्बर र इमेल उपलब्ध गराउन अनुरोध गरिएको छ ।
