५-० को फराकिलो जित निकाल्दै युनाइटेड युथ क्लब गिरुबारी फाइनलमा प्रबेश

पाल्पा ।

युनाइटेड युथ क्लब गिरुबारी नवलपरासी पाल्पामा जारी दोस्रो ज्योतिपुञ्ज कप राष्ट्रिय नकआउट फुटबल प्रतियोगिताको फाइनलमा प्रवेश गरेको छ ।

बुधबार भएको पहिलो सेमिफाइनल खेलतर्फ युनाइटेड युथ क्लबले फर्साटिकर युवा क्लब रुपन्देहीमाथि ५-० को फराकिलो जित निकालेको हो । युनाइटेड उपाधि नजिक पुग्न सफल भएको छ । युनाइटेड युथका लागि अनिल राना मगर र समिप ढकालले समान २-२ गोल जोडे भने सलिल ढकालले थप एक गोल गर्न सफल भएका थिए । खेलमा युनाइटेड युथका अनिल राना मगर प्लेयर अफ दि म्याच चुनिएका छन् ।

प्रतियोगिता अन्तर्गत कार्तिक ८ गते बिहिबार एउटा क्वाटरफाइनल खेल बाँकी रहेको खेल संयोजक अनिल शाहीले बताउनुभयो । एकातर्फी जित निकाल्दै युनाइटेड फाइनलमा पुगेको हो । बिहीबार देवदह ब्वाईज रुपन्देही र गन्नी फुटबल क्लब पोखरा भिड्ने शाहीले जानकारी दिनुभयो ।

ज्योतिपुञ्ज युथ क्लब रामपुर ७ किसानबारी पाल्पाको २८ औं बार्षिकोत्सवको अबसरमा आयोजनामा गरिएको प्रतियोगितामा १० विभिन्न क्लबको सहभागिता रहेको छ । खेलको विजेताले उपाधिसहित नगद ३ लाख ३ हजार ३ सय ३३ रुपैयाँ हात पार्नेछ भने उपविजेताले १ लाख ७७ हजार ७ सय ७७ रुपैयाँसहित ट्रफी, मेडल र प्रमाणपत्र प्राप्त गर्ने आयोजक ज्योतिपुन्ज युवा क्लबका अध्यक्ष सुदिप गौतमले जानकारी दिनुभयो । प्रतियोगिताको फाइनल खेल आगामी कार्तिक १० गते शनिबारका दिन हुनेछ ।