पत्रकार बेलबासे १ लाख राशीको पुरस्कारबाट सम्मानित

काठमाडौं ।
सरकारले पत्रकार एवं कवि ठाकुर बेलवासेलाई राष्ट्रिय पत्रकारिता पुरस्कर–२०७८ प्रदान गरेको छ । साढे दुई दशकदेखि पत्रकारितामा रहेका बेलवासेलाई सञ्चार तथा सूचना प्रविधि मन्त्रालयले १ लाख राशि सहितको पुरस्कार प्रदान गरेको हो ।

उनले २०५४ सालदेखि पत्रकारिता गर्दै आएका हुन् । बेलवासे रेडियो र टेलिभिजन पत्रकारितामा लोकप्रिय छन् । जनसत्ता सप्ताहिकबाट पत्रकारिता सुरु गरेका बेलवासेले दर्जनभन्दा बढी सञ्चारमाध्यममा काम गरेको अनुभव सँगालेका छन् ।
कौटिल्य सप्ताहिक ,रेडियो नागरिक र रेडियो अन्नपूर्ण नेपाल लगायत आधा दर्जन सञ्चारमाध्यममा सम्पादकको भूमिकामा रहेर काम गरेका बेलवासे अहिले एपी वान टेलिभिजनमा आबद्ध छन् ।

नेपाली सहित्यमा पनि उत्तिकै दख्खल राख्ने कवि बेलवासेका चार कृति प्रकाशित छन् । उनको ‘त्रासमा ईश्वर’ कृतिले २०६९ सालको साझा पुरस्कार प्राप्त गरेको थियो । उनी दर्जन बढी पुरस्कार तथा सम्मान प्राप्त गरेका छन् ।

साथै, सरकारले राष्ट्रिय पत्रकारिता पुरस्कारबाट पत्रकारहरू बालकुमार नेपाल, डिआर पन्त , गङ्गा बराल, सम्झना बन र इकबाल अहमदलाई पुरस्कृत गरेको छ । वरिष्ठ पत्रकार सम्मान २०७८ किशोर नेपाल र तारानाथ दाहाललाई प्रदान गरेको छ । उनीहरूलाई राष्ट्रपति भवनमा आयोजित कार्यक्रममा राष्ट्रपति विद्यादेवी भण्डारीले पुरस्कार प्रदान गर्नुभएको हो ।