रिब्दीकोट गाउँपालिकाको बजेट ५३ करोड ६८ हजार रुपैयाँ गाउँसभामा प्रस्तुत

पाल्पा ।

आगामी आर्थिक वर्षका लागि पाल्पाको रिब्दीकोट गाउँपालिकाले ५३ करोड ६८ हजार रुपैयाँको बजेट गाउँसभामा प्रस्तुत गरेको छ । यस अघि नै वार्षिक नीति तथा कार्यक्रम प्रस्तुत गरिसकेको रिब्दीकोटले १३ औं गाउँसभाको दोस्रो बैठकमा उपाध्यक्ष कान्ता अधिकारीले बजेट प्रस्तुत गर्नुभएको हो ।

यसैगरी गाउँपालिकाको आन्तरिक स्रोतबाट ७३ लाख ७७ हजार, जलविद्युत् रोयल्टी, खानी तथा वन रोयल्टीबाट अनुमानित ४० लाख, चालु आर्थिक वर्षको बचत हुने रकम १ करोड ५० लाख तथा अन्य विविध आम्दानी र संघसंस्था सहयोगबाट १ करोड ३६ लाख ९७ हजार रहेको छ ।

चालु आर्थिक वर्षमा खर्च ६७ दशमलव ६० र पुँजीगततर्फ ७६ प्रतिशत खर्च भएको प्रमुख प्रशासकीय अधिकृत मदन अर्यालले जानकारी दिनुभयो । पुँजीगत बजेट खर्चमा सुधार ल्याउन र विकास निर्माणमा गुणस्तर कायम गर्न जेठ मसान्तपश्चात् भुक्तानी नदिने नीतिअनुरुप वडा अन्तर्गतको विकास खर्च भुक्तानी गर्ने कार्य लगभग सकिएको अर्यालले बताउनुभयो । संघीय र प्रदेश सरकारको बजेट अख्तियारी ढिलो प्राप्त भएकाले कतिपय ठूला योजना भने सम्पन्न हुन बाँकी रहेको गाउँपालिका अध्यक्ष नारायणबहादुर कार्कीले बताउनुभयो ।

चालु आर्थिक वर्षमा गाउँपालिकाले एकीकृत घुम्ती शिविरमार्फत ४ वडामा ८५० नागरिकलाई सेवा दिएको र उत्पादनमा आधारित अनुदानअन्तर्गत दूध, गोलभेँडा, सुन्तलामा ४ सय १५ किसानलाई बैंक खातामार्फत अनुदान दिएको अध्यक्ष कार्कीले बताउनुभयोएल । गाउँपालिकाले ‘म बनाउँछु मेरो रिब्दीकोट’ कार्यक्रमअन्तर्गत विभिन्न कार्यक्रम गरी २१ लाख ८१ हजार बराबरको काम भएको जनाएको छ ।

गाउँपालिकाले ‘एक टोल एक सामूहिक खेती’अन्तर्गत स्थलगत तालिमका लागि ३० लाख, उत्पादनमा आधारित अनुदान, कृषिउपज उत्पादन गर्ने किसानलाई प्रोत्साहन गर्ने, किसानलाई अनुदानको दायरा विस्तार गर्न ५० लाख, जलेश्वर पर्यटन पूर्वाधारका लागि १ करोड ५० लाख विनियोजन गरेको छ । श्रम र श्रमिकको मर्यादा हुने गरी रोजगारी सिर्जना गर्न र ५ वर्षे रणनीति योजना निर्माणका लागि ४९ लाख ११ हजार विनियोजन गरेको बजेटमा उल्लेख छ ।