११३ औं नारी दिवसको सन्दर्भमा बगनासकालीमा विविध कार्यक्रम सम्पन्न

पाल्पा ।

बगनासकाली गाउँपालिका महिला समन्वय समिति पाल्पाले गाउँपालिका सभाहलमा हाजिरी जवाफ प्रतियोगिता सहित विविध कार्यक्रम सम्पन्न गरेको छ ।

‘लैंगिक समानताको बलियो आधार: सृजनात्मक प्रविधिमा महिला पहुँचको विस्तार’ भन्ने नारासहित ११३ औं अन्तर्राष्ट्रिय महिला दिवसको अवसरको सन्दर्भ पारेर बगनासकाली गाउँपालिकाको सहयोग र गाउँ महिला समन्वय समितिको आयोजनामा कार्यक्रम भएको हो ।

प्रतियोगितामा गाउँपालिकाका नौ वटै वडाका महिला सञ्जालबाट सक्रिय सहभागिता थियो । हाजिरीजवाफ तर्फ प्रथम वडा नं. ३, द्वितीय वडा नं. १ र तृतीय वडा नं. ८ को टोलीले क्रमशः ७ हजार, ६ हजार र ५ हजार नगद पुरस्कार प्राप्त गरेका छन् । अन्य सहभागीले सान्त्वना स्थान हासिल सहित प्रोत्साहन वापत प्रतिसमुह ४ हजार नगद प्राप्त गर्नुभएको थियो । यस्तै कुर्ची दौडतर्फ दुर्गा पाण्डे प्रथम, धनमाया बगाले द्वितीय र दुर्गा कुँवरले तृतीय स्थानसहित पुरस्कार प्राप्त गर्नुभयो ।

शुभकामना मन्तव्य राख्दै गाउँपालिका अध्यक्ष सरस्वती चिदीले महिला सशक्तिकरणकाको लागि गाउँपालिकाले विभिन्न दिवसीय कार्यक्रमलाई निरन्तरता दिदै आएको बताउनुभयो । गाउँपालिका उपाध्यक्ष हरिप्रसाद पाठकले महिला हक अधिकारका लागि महिलाहरूकै सक्रियता आवश्यक हुनेमा जोड दिनुभयो । गाउँपालिका प्रवक्त टिकाबहादुर थापाले महिला अधिकारका क्षेत्रमा गाउँपालिकाले विभिन्न दिवसीय कार्यक्रमलाई निरन्तरता दिदै महिला हक अधिकार सुनिश्चित गर्नतर्फ उत्प्रेरित गर्दै आएको जनाकारी दिनुभयो ।

गाउँपालिकाका निमित्त प्रमुख प्रशासकीय अधिकृत गुनाराम खनाल, एम.आई.एस.अपरेटर भोजराज भट्टराई, महिला विकास शाखाप्रमुख धनकुमारी राना, खानेपानी प्राविधिक विनोद केसीलगायतले कार्यक्रममा सहजीकरण गर्नुभएको थियो । बगनासकाली गाउँपालिका महिला समन्वयसमितिका अध्यक्ष सरस्वती चिदीको अध्यक्षता, कोषाध्यक्ष दुर्गा रानाको स्वागत र सचिव उर्मिला कुँवरको सञ्चालनमा कार्यक्रम सम्पन्न भयो ।