स्थानीय निर्वाचनका लागि पाल्पामा पनि ५ दलिय गठबन्धनको संयन्त्र

पाल्पा।

पाल्पामा पनि आगामी बैशाख ३० गते हुने स्थानीय तह निर्वाचनका लागि ५ दलीय गठबन्धन हुने भएको छ ।

नेपाली काङ्ग्रेस पाल्पाका सभापति हिमालदत्त श्रेष्ठको अध्यक्षतामा बसेको दलिय बैठकले ५ दल बिच गठबन्धन हुने जनाएको हो । बैठकमा नेपाली काग्रेँस, नेकपा माओबादी केन्द्र, नेकपा एकिकृत समाजवादी, राष्ट्रिय जनमोर्चा तथा जनता समाजवादी पार्टीका जिल्ला प्रमुखहरुको सहभागिता थियो ।

बुधबार गठबन्धन दलहरुको संयन्त्रको बैठकले आगामी निर्वाचनमा जिल्लाका सबै स्थानीय तहमा चुनावी तालमेल गर्ने निर्णय भएको हो । बैठकले चुनावी तालमेलका सम्बन्धमा काग्रेँस सभापति हिमाल दत्त श्रेष्ठको सयोजकत्वमा संयन्त्र निर्माण गरेको छ । जसको सदस्यमा नेकपा माओवादी केन्द्रका जिल्ला अध्यक्ष नेत्र प्रसाद पाण्डे, एकिकृत समाजवादीका जिल्ला अध्यक्ष खिमानन्द पाण्डे (कमल), राष्ट्रिय जनमोर्चाका जिल्ला अध्यक्ष विशाल दर्लामी र जनता समाजवादीका मेयरमान राना रहेका छन् ।

संयन्त्रले गठबन्धन दलहरु बीच आवश्यक छलफल, परामर्श गर्न हरेक दलबाट ३/३ जना सहभागि हुने गरी एक कार्यदल गठन गर्ने निर्णय पनि गरेको छ ।