काङ्ग्रेस संसदीय दलको नेतामा पार्टी सभापति देउवा बिजयी
Sabalnews
प्रकाशित मिति :
बुधबार, पौस ६ २०७९
काठमाडौं ।
कांग्रेस संसदीय दलको नेतामा पार्टी सभापति शेरबहादुर देउवा विजयी हुनुभएको छ ।
बुधबार भएको निर्वाचनमा प्रधानमन्त्री समेत रहनुभएका पार्टी सभापति देउवाले ६४ मत ल्याएर विजयी हुनुभएको हो । प्रतिस्पर्धा गर्नुभएका पार्टीका महामन्त्री गगन थापाले २५ मत पाउनुभयो । कांग्रेस संसदीय दलको निर्वाचनमा नवनिर्वाचित ८९ सांसदले मतदान गरेका थिए । ०५१ सालमै तत्कालीन पार्टी सभापति गिरिजाप्रसाद कोइरालाको समर्थनमा संसदीय दलको नेता हुनुभएका देउवा ४९ वर्षको उमेरमा प्रधानमन्त्री हुनुभएको थियो ।
पार्टी सभापति कोइरालाकै समर्थनमा ०५६ मा सालमा नेता कृष्णप्रसाद भट्टराई प्रधानमन्त्रीका लागि संसदीय दलको नेता हुनुभयो । तत्कालीन माओवादी द्वन्द्व व्यवस्थापनमा भट्टराई र कोइराला असफल भएपछि देउवा दोस्रो र तेस्रो पटक प्रधानमन्त्री हुनुभयो ।
०६२/६३ को आन्दोलनपछि चौथो र संविधान निर्माण पश्चात् देउवा पाँचौं पटक प्रधानमन्त्री हुनुभयो । ०६४ मा देउवालाई पराजित गरेर पार्टी नेता रामचन्द्र पौडेल दलको नेता हुनुभयो । तर प्रधानमन्त्रीका लागि संसद्ममा १७ पटक प्रतिस्पर्धा गर्दा पनि पौडेल विजयी हुनुभएन ।
०७० मा निर्वाचनपछि तत्कालीन पार्टी सभापति सुशील कोइरालासँग पनि देउवा पराजित हुनुभएको हो ।०७४ को निर्वाचनपछि संसदीय दलको नेतामा भने देउवा बिजयी हुनुभयो । १३ औं महाधिवेशनमा देउवा सभापति चुनिनुभएको थियो ।
