४८ इजरायली बन्धकहरूको ‘बिदाइ तस्बिर’मा नेपालका बिपिन जोशी

हमासको सशस्त्र शाखा कासम ब्रिगेडले शनिबार ४८ इजरायली बन्धकहरूको ‘बिदाइ तस्बिर’ अनलाइनमा सार्वजनिक गरेको छ ।

इजरायली सेनाको घेराबन्दीमा परेको गाजाको सबैभन्दा ठूलो शहरी केन्द्रलाई ध्वस्त पार्ने र कब्जा गर्ने अभियान चलाइरहेको बेला सार्वजनिक तस्बिरमा नेपालका विपिन जोशीको पनि अनुहार देखिन्छ ।

यस संकलित तस्बिरमा जीवित र मृतक सबै बन्धकहरूको अनुहार देखाइएको छ । तस्बिरमा ‘रोन अरद’ भन्ने क्याप्सन राखिएको छ, जुन सन् १९८६ मा लेबनानमा बेपत्ता भएका इजरायली वायुसेनाका पाइलट क्याप्टेन रोन अरदप्रति संकेत हो ।

अरदको एफ-४ फ्यान्टम विमान दक्षिणी लेबनानमा हमलाका क्रममा बम समयअघि नै विस्फोट हुँदा दुर्घटनाग्रस्त भएको थियो । उनलाई अमल आन्दोलनले पक्राउ गरेर हिजबुल्लाहलाई सुम्पिएको थियो । यद्यपि उनको मृत्यु भएको मानिए पनि यसको कुनै ठोस प्रमाण फेला परेको छैन ।

हमासले तस्बिरसँगै एउटा सन्देश पनि जारी गरेको थियो । सन्देशमा भनिएको छ  “नेतन्याहूको इन्कार र जामरको आत्मसमर्पणका कारण, गाजा शहरमा सैन्य कारबाही सुरु भएपछि यो बिदाइ तस्बिर सार्वजनिक गरिएको हो ।”

यो बयान इजरायली प्रधानमन्त्री बेन्जामिन नेतन्याहूले गाजामा जारी युद्धलाई अन्त्य गर्न हमाससँग सम्झौता गर्न बारम्बार अस्वीकार गरेपछि आएको हो । इजरायली सेना प्रमुख अयाल जामरले पनि सरकारको ‘विजय योजना’ प्रति सार्वजनिक रूपमा असहमति जनाए पनि, उनको नेतृत्वमा आक्रमण झनै तीव्र बनाइएको छ  हवाई तथा स्थल दुवै माध्यमबाट ।

इजरायली अधिकारीहरूले करिब २० जना बन्धकहरू अझै गाजामा जीवित रहेको विश्वास व्यक्त गरेका छन् । तर पूर्व अमेरिकी राष्ट्रपति डोनाल्ड ट्रम्पले भने तीमध्ये २० भन्दा कम मात्र जीवित हुन सक्ने बताएका छन् । नेतन्याहूले भने बारम्बार सबै जीवित तथा मृत बन्धकहरूलाई फर्काउने र हमासलाई ‘पूर्ण रूपमा नष्ट’ गर्ने वाचा गर्दै आएका छन् ।

हमासले गाजामा इजरायली आक्रमण तीव्र भएसँगै  बन्धकहरूको जीवन थप जोखिममा परेको चेतावनी बारम्बार दिँदै आएको छ । केही बन्धकहरू इजरायली आक्रमणमै ज्यान गुमाएको दाबी समेत गरिएको छ । हमासले बन्धकहरू गाजा शहरका विभिन्न भागमा छरिएका पनि जनाएको छ ।

हमासको शनिबारको यो ‘बिदाइ तस्बिर’ सार्वजनिक गर्नु इजरायलका लाखौं नागरिक फेरि सडकमा उत्रन लागेभन्दा केही घण्टा अघिको कुरा हो । प्रदर्शनकारीहरू नेतन्याहू सरकारको आलोचना गर्दै युद्ध अन्त्य गर्न तथा सबै बन्धकहरूलाई फिर्ता ल्याउन तत्काल र व्यापक सम्झौतामा पुग्न माग गर्दै आएका छन् ।

यसअघि, हमासले दुई इजरायली बन्धकहरूको भिडियो सार्वजनिक गरिसकेको छ । त्यो भिडियो दुई अन्य कुपोषणग्रस्त बन्धकहरूको फुटेज सार्वजनिक भएको करिब एक महिनापछि आएको थियो । तीमध्ये एकलाई आफ्नै चिहान खन्दै गरेको देखाइएको थियो । यस्ता तस्बिर र भिडियोहरूले बन्धक परिवार, इजरायली सरकार तथा अमेरिकी अधिकारीहरूमा तीव्र आक्रोश पैदा गरेको छ ।

गाजाको स्वास्थ्य मन्त्रालयका अनुसार, अक्टोबर २०२३ मा युद्ध सुरु भएदेखि हालसम्म इजरायली हमलामा कम्तीमा ६५,२०८ जना प्यालेस्टिनीको मृत्यु भएको छ भने १,६६,२७१ जना घाइते भएका छन् । मार्च १८ मा युद्धविराम भंग भएपछि मात्रै १२,६५३ जना मारिएका छन् र ५४,२३० जना घाइते भएका छन् ।