धरहरा चढ्न आजबाट पैसा लाग्ने

Sabalnews प्रकाशित मिति : आइतबार, मंसिर ९ २०८१

1.6K

काठमाडौँ ।

काठमाडौंको धरहरा चढ्दा आज आइतबारदेखि शुल्क लाग्ने भएको छ । धरहरा चढ्दा प्रतिव्यक्ति २ सय रुपैयाँ शुल्क तिर्नुपर्ने छ । विद्यार्थी, ज्येष्ठ नागरिक र अपांगता भएका व्यक्तिले भने उक्त रकममा ५० प्रतिशत छुट पाउनेछन् । उनीहरूले एक सय रुपैयाँ तिरे पुग्नेछ ।

सार्क राष्ट्रबाट आउने पर्यटकलाई प्रतिव्यक्ति ५ सय र सार्कबाहेक राष्ट्रबाट आउनेलाई प्रतिव्यक्ति १ हजार रुपैयाँ शुल्क तोकिएको सहरी विकास मन्त्रालयले जनाएको छ । अहिलेसम्म धरहरा खुला गरिएको भए पनि अब शुल्क निर्धारण गरेर चलाउन लागिएको केन्द्रीय आयोजना कार्यान्वयन इकाई आयोजनाले जनाएको छ ।

धरहरामा गत असोज ३ गते संविधान दिवसको दिनदेखि शनिबारसम्म ९० हजारले धरहरा चढेका छन् ।

अहिलेसम्म बिहान १० देखि दिउँसो ४ बजेसम्म चलाएकोमा अब समय पनि हेरफेर हुन सक्नेछ । सुन्धारा चोकको सडकबाट धरहरा परिसर प्रवेश गर्दा पनि ५० रुपैयाँ शुल्क लाग्नेछ । धरहरा परिसरमा व्यावसायिक भिडियो छायांकन शुल्क प्रतिघण्टा ५ हजार र व्यावसायिक फोटोग्राफी छायांकन शुल्क प्रतिघण्टा १ हजार रुपैयाँ तोकिएको मन्त्रालयले जनाएको छ ।

धरहरा स्तम्भमा राष्ट्रिय महत्त्वका व्यावसायिकबाहेकको विज्ञापनले प्रतिघण्टा ५ हजार रुपैयाँ शुल्क तिर्नुपर्नेछ ।

सरकारले काठमाडौंको धरहरा, झापाको दमक भ्युटावरसहित देशका ६ वटा भौतिक संरचनालाई ‘विशिष्ट संरचना’ घोषणा गरेको छ । घोषणासँगै सरकारले ती संरचना सञ्चालन निजी क्षेत्रबाट गराउने प्रस्ताव अघि सारेको हो ।

प्रतिकृया दिनुहोस