एन्फाद्दारा रामपुरका ७ विद्यालयलाई फिफा बल हस्तान्तरण
Sabalnews
प्रकाशित मिति :
बिहिबार, मंसिर २६ २०८२
पाल्पा।
अखिल नेपाल फुटबल संघ एन्फाले जिल्लाका विद्यालयलाई फुटबल हस्तान्तरण गर्ने कार्यक्रम अन्तर्गत बिहिबार रामपुरका विद्यालयलाई बल हस्तान्तरण गरेको छ ।
एन्फाले ‘फिफा फुटबल फर स्कुल्स’ कार्यक्रम चलाएको छ । सोही कार्यक्रम अन्तर्गत एन्फाले जिल्ला फुटबल संघ पाल्पाको सहकार्यमा विद्यालयलाई फुटबल वितरण गरेको हो ।
जिल्ला फुटबल संघका अध्यक्ष प्रणय बिरजंग राणाले रामपुर नगरपालिका भित्रका सात माध्यमिक विद्यालयलाई फिफा बल हस्तान्तरण गरिएको बताउनुभयो । फुटबलको भविष्य बलियो बनाउन विद्यालय तहबाटै कार्यक्रम जोडेको बताउदै उहाँले बालबालिकामा खेलप्रति लगाव बढाउन र अनुशासन र उत्तरदायी बनाउन ‘फिफा फुटबल फर स्कुल्स’ कार्यक्रम ल्याएको उल्लेख गर्नुभयो ।
पाल्पामा पहिलो चरणमा २६ विद्यालयलाई १५ वटा बलका दरले फिफा बल प्रदान गरिएको जिल्ला फुटबल संघका सदस्य किरण चित्रकारले बताउनुभयो ।
पाल्पा जिल्ला फुटबल संघका सदस्य अनिल शाहीका अनुसार रामपुर नगपालिका भित्रका वडा नं. ५ को भूपू सैनिक राईजिङ्ग अंग्रेजी मावि र रामपुर अंग्रेजी आवासिय मावि, वडा नं. ६ को दरैठाँटी मावि र नवदुर्गा मावि, वडा नं. ७ को आधारभूत मावि, वडा नं. ८ को गंगा मावि र वडा नं. १० को भानुभक्त माविलाई फिफा बल हस्तान्तरण गरिएको छ ।
