वालिङ् नगरपालिका ३ दिने महोत्सव गर्दै, मङ्सिर १७ देखि १९ सम्म महोत्सव चल्ने
Sabalnews
प्रकाशित मिति :
बिहिबार, मंसिर १२ २०८२
स्याङ्जा ।
जिल्लाको वालिङ नगरपालिकाले ३ दिने सडक खाना महोत्सवको घोषणा गरेको छ । स्थानीय उत्पादनको बजारीकरण गर्ने,जातिय भेषभुषा, संस्कृतिको प्रस्तुति,स्थानीय कलाकारको प्रस्तुति रहने गरी तयारी गरिएको महोत्सव यही मङ्सिर १७, १८ र १९ गते आँधीखोला करिडोरस्थित पतन्जली, खेलमैदान–सुर्कौदी पुलसम्मको सडक क्षेत्रमा गर्न लागिएकोे बुझिएको छ ।
सडक खाना महोत्सवका लागि आगामी मङ्सिर १५ सम्ममा स्टल बुकिङ गर्न नगरपालिकाले आव्हान गरेको छ । तोकिएको ठाउँमा स्टल राख्न पाइने र यसका लागि प्रतिदिन रुपियाँ ५ सय रुपैयाँ शुल्क तोकिएको नगरपालिकाले जनाएको छ ।
तीन दिनसम्म सञ्चालन हुने महोत्सव भब्य बनाउन नगर उपप्रमुख कविता तिवारीलाई संयोजक तोकेको छ ।
नगरपालिकाको आयोजनामा भने यो पहिलोपटक महोत्सव गर्न लागिएको हो । यसलाई सडक खाना महोत्सव नामकरण गरिएको छ । महोत्सवलाई ऐतिहासिक र मौलिक बनाउने तयारी गरिएको छ ।
