सुत्केरीको मृत्यु भएपछि किष्ट अस्पतालमा तोडफोड, आफन्ती र प्रहरी बिच झडप

काठमाडौं । 

ललितपुरको इमाडोलस्थित किष्ट मेडिकल कलेज शिक्षण अस्पतालमा सुत्केरीको मृत्यु भएपछि मृतकका आफन्त र स्थानीयले व्यापक तोडफोड गरेका छन् । चिकित्सकको चरम लापरवाहीका कारण बिरामीको ज्यान गएको आरोप लगाउँदै आक्रोशित भीडले अस्पतालमाथि आक्रमण गरेको हो ।

शुक्रबार राति खोटाङको हलेसी तुवाचुङ नगरपालिका-९ की ३४ वर्षीया मिनाश्री राईको सुत्केरी गराउने क्रममा निधन भएको थियो । यस घटनालगत्तै मृतकका आफन्तले अस्पताल प्रशासन र चिकित्सकको लापरवाहीलाई मृत्युको मुख्य कारण दाबी गर्दै प्रदर्शन सुरु गरेका थिए ।

शनिबार बिहानैदेखि उग्र बनेको प्रदर्शनका क्रममा सयौंको संख्यामा भेला भएका आक्रोशित प्रदर्शनकारीहरूले अस्पतालको मुख्य प्रवेशद्वार तोडेर भित्र पसेका थिए । उनीहरूले अस्पतालका झ्यालका सिसाहरू फुटाउनुका साथै भित्री संरचनामा समेत ढुंगामुढा प्रहार गरेका छन् । प्रदर्शनकारीहरूको आक्रोश यति तीव्र थियो कि अस्पताल परिसर रणभूमिमा परिणत भएको थियो ।

परिस्थिति नियन्त्रणभन्दा बाहिर जान थालेपछि प्रहरीले हस्तक्षेप गरेको थियो । भीडलाई तितरबितर पार्न प्रहरीले लाठीचार्ज गर्नुका साथै केही राउन्ड अश्रुग्याससमेत प्रहार गरेको थियो । झडपका क्रममा केही प्रदर्शनकारी र प्रहरी घाइते भएको प्रारम्भिक जानकारी प्राप्त भएको छ ।

अस्पताल तोडफोड र झडपका कारण त्यस क्षेत्रको जनजीवन प्रभावित बनेको छ । मृतकका आफन्तले दोषी चिकित्सकलाई कारबाही र उचित क्षतिपूर्तिको माग गर्दै प्रदर्शन जारी राख्ने चेतावनी दिएका छन् ।