फराकिलो जित निकाल्दै डिफेन्डिङ च्याम्पियन युनाईटेड युथ क्लव सेमिफाइनल प्रबेश

खेलको ९ औं मिनेट मै युनाईटेड युथका लागि क्याप्टेन याम प्रसाद बुढा मगरले गोल गरे। खेलको ३७ औं मिनेटमा युनाईटेडका अनिल राना र ६० औं मिनेटमा लक्षु थापाले युनाईटेडका लागि थप गोल गरे। लगतै ६४ औं मिनेटमा सम्पूर्ण युथ क्लवका दर्शन वि.क.ले १ गोल फर्काए र सम्पुर्णको गोलको खाता खोले ।

खेलको ७२ औं मिनेटमा युनाइटेडका अनिल रानाले पुनः टिमको चौथो र व्यक्तिगत दोस्रो गोल गर्न सफल भए । त्यसको छैठौं मिनेटपछि ७८ औं मिनेटमा युनाइटेडका चुरामणि खाम्चाले थप एक गोल गर्दै गोलको अन्तर बढाए भने खेलको अन्तिम गोल ८४ औं मिनेटमा गर्दै अनिल राना मगरले ह्याट्रीक पूरा गरे । रानाको ह्याट्रीक प्रतियोगिता अवधिभर कै पहिलो हो । ह्याट्रीक गर्न सफल युनाईटेड युथका खेलाडी अनिल राना मगर म्यान अफ दि म्याच बन्दै नगद ३ हजार प्राप्त गरे । युनाईटेड कै लक्षु थापाले रेडबुल इनर्जेटिक प्लेयर अफ दि म्याचको उपाधिसगै गिफ्ट ह्याप्पर प्राप्त गरे ।

जिल्ला कै सर्वाधिक पुरस्कार राशी सहितको प्रतियोगितामा युनाइटेड युथ क्कब सेमिफाइनलमा प्रवेश गर्ने दोस्रो समूह बनेको छ । यस अघि आयोजक ज्योतिपुञ्ज युवा क्लव सेमिफाइनलमा प्रवेश गरिसकेको छ । मंगलबार भएको खेलमा भैरब स्पोर्टस् क्लव नवलपरासीलाई २–१ गोल अन्तरले पराजित गर्दै ज्योतिपुञ्ज सेमिफाइनलमा पुगेको थियो ।
विहिबार तेस्रो क्वाटरफाइनल खेल हुनेछ । जहाँ ‘ए’ डिभिजन क्लव हिमालयन शेर्पा काठमाडौ र अभिषेक चर्च रजहर नवलपुर बिचको खेल हुने संयोजक अनिल शाही ठकुरीले जानकारी दिनुभयो ।

रामपुर नगरपालिका ७ किसानबारीमा जारी प्रतियोगितामा १० समूहले भाग लिएका छन् । प्रतियोगिताको फाइनल खेल कार्तिक ३ गते हुनेछ । प्रतियोगिताको विजेता समूहले नगद ३ लाख ५० हजार र उपविजेताले २ लाख रुपैयाँसहित ट्रफी प्राप्त गर्नेछ । सेमिफाइनल पराजित टिमले २५/२५ हजार प्राप्त गर्नेछ ।
प्रतियोगिताका सर्वोत्कृष्ट खेलाडीले १७ हजार रुपैयाँ र ट्रफी सहित बिधागत तर्फ सर्वाधिक गोलकर्ता, उत्कृष्ट गोलकिपर, उत्कृष्ट डिफेन्डर, इमर्जिङ प्लेयर, उत्कृष्ट कोचले जनही ८ हजार प्राप्त गर्नेछन्।