श्रम तथा रोजगार मन्त्रालयले ७ वटै प्रदेशमा ‘‘श्रमाधान रोजगार मेला’’ गर्ने

काठमाडौं ।

श्रम, रोजगार तथा सामाजिक सुरक्षा मन्त्रालयले देशका ७ वटै प्रदेशमा श्रमाधान रोजगार मेला गर्ने भएको छ । मन्त्रालयमा मंगलबार आयोजित पत्रकार सम्मेलनमा श्रम, रोजगार तथा सामाजिक सुरक्षा मन्त्री डोलप्रसाद अर्यालले रोजगारदाता र कामको खोजीमा रहेका कामदारलाई जोड्ने गरि रोजगार मेलाको आयोजना गरिएको जानकारी दिनुभयो ।

आगामी जेष्ठ महिनाको १७ गतेदेखि ३० गतेसम्म सातै प्रदेशमा २/२ दिनको ‘श्रमाधान रोजगार मेला चल्नेछ । पत्रकार सम्मेलनमा बोल्दै श्रम, रोजगार तथा सामाजिक सुरक्षा मन्त्री अर्यालले रोजगार दाता र रोजगार खोजी रहेका नेपाली नागरिकहरु विचको पुलको काम गर्नका लागि संघिय मन्त्रालय अन्तर्गत बैदेशिक रोजगार बोर्ड, प्रदेश मन्त्रालय, निजि क्षेत्र, सर्वसाधारण नागरिक सबैको सहयोगमा कार्यक्रम आयोजना गर्न लागेको बताउनुभयो । नगरपालिका, गाउँपालिका महासंघदेखि व्यापारी, व्यवसायी, उद्यमी, रोजगार सँग सम्बन्धित संस्था तथा दर्जन बढी सरोकारवालाको समन्वयमा कार्यक्रम हुन लागेको हो ।

अभियान अन्तर्गत जेठ १७ र १८ गते कोशी प्रदेशको विराटनगर, जेठ १९ र २० गते मधेश प्रदेशको बिरगंज, २१ र २२ गते गण्डकीको पोखरा, २३ र २४ गते लुम्बिनीको वुटवल, २५ र २६ गते कर्णाली प्रदेशको सुर्खेत, २७ र २८ गते सुदुरपश्चिमको धनगढी र २९ र ३० गते बाग्मतीको ललितपुरमा कार्यक्रम हुनेछ ।

मेलामा कम्पनी के का लागि के उद्देश्यले दर्ता भएको छ? कामदार आउन र भित्रन सक्ने अबस्था के छ? कामदारले के खोजेको छन्? के आबश्यकता र सरकारी, निजि क्षेत्र र सरोकारवाला संस्था एंव नागरिकको समन्वय वातावरण सिर्जना गर्न सक्छौं भन्ने सोचले पहिलो पटक मेलाको आयोजना गरेको मन्त्री अर्यालले बताउनुभयो । प्रविधिमा नआएका नेपालीलाई कसरी जोड्न सकिन्छ भनेर पनि त्यसको नजिकै गएर यस्ता विषय खोजी गर्न पनि मेला सान्दर्भिक हुने बताइएको छ । मन्त्रालयले पहिलो पटक यस्तो प्रकारको मेला प्रदेशमा गर्दैछ, अर्काे बर्ष जिल्ला र स्थानीय तहमा गर्नका लागि सुझाउन समेत अनुरोध गर्दै मेला राखिएको हो ।

मन्त्रालयले अर्काे बर्ष अझ प्रभावकारी गरेर कार्यक्रम गर्न यसको लागि बजेट छुट्याएको छ । सबै प्रदेशलाई पनि रोजगार मेलाबाट श्रम र रोजगारीको प्रत्याभूतिका लागि मेला गर्न सुझाएका छौं, यसलाई सफल पार्न सबैले सघाउनुपर्छ अर्यालले भन्नुभयो । मन्त्री अर्यालले श्रमाधान रोजगार मेला के र केका लागि बिषयक छोटो भिडियो सामाग्रीको शुभारम्भ गर्नुभयो ।

श्रमको बजारमा जोड्ने, सहकार्यता र सीप विकासमा जोड्ने, उद्यमशीलतालाई प्रोत्साहन गर्न, प्रोत्साहनबाट श्रम सिर्जना हुन्छ, श्रमले आर्थिक लाभ गर्छ जुन सुस्ताएको श्रम बजार छ त्यो उकास्न र अर्काे युवाहरुलाई मोटिभेसन गर्दै श्रम बजारमा सहज ल्याउन पनि मेला सार्थक हुने विश्वास मन्त्रालयले लिएको छ ।

रोजगार मेलामा रोजगारदाता, रोजगारीबाट फर्केकाको अनुभव र भोगाई, श्रम कल सेन्टर, काम गर्दै आएका बिज्ञ, विभिन्न सीपयुक्त तालिम प्रदान गरिरहेका प्रशिक्षण केन्द्रको सहभागिता रहनेछ । सोही अबसरमा प्यानलगत रुपमा बिज्ञ र सरोकारसँग अन्तरक्रिया, कार्यशाला हुनेछ ।
मेलामा रोजगार सँग सम्बन्धित संस्थाहरुको प्रतिनिधित्व र सचेतनामुलक बुथ पनि रहनेछ । सामी बुथ, रेमी अर्थात् फर्किएकालाई कसरी पुर्नस्थापना बुथ, नेपाल च्याम्बर कर्मश बुथ, उद्योग वाणिज्य, होटेल व्यबसायी, नेपाल तालिम तथा रोजगार महासंघ बुथ, सीप बिकास तालिम, रोजगार बुथ, ल बुथ, सेकेन्ड इनिङ बुथ, कल सेन्टर बुथ लगायत सरोकारवाला संस्थाको बुथ रहनेछ । मेलामा सहभागिताका लागि मंगलबारदेखि अनलाईन फर्म खुलेको मन्त्रालयले जनाएको छ ।

सीप र अनुभवका प्यानल, कानुनी र मनोबैज्ञानिक प्रभाव, गिग इकोनोमीका अबसर र चुनौतीहरु, अर्थतन्त्रमा श्रम आप्रबासको प्रभाव सहित स्थानीय स्तरमा श्रम र सीप बिषयमा प्यानलगत रुपमा छलफल चल्ने मन्त्रालयका सचिब घनश्याम उपाध्यायले जानकारी दिनुभयो । ।

७ प्रदेशमा १४ दिनसम्म चल्ने मेलाबाट नेपालमा के–कस्ता रोजगार दाताहरु छन् ? त्यसको जानकारी, विदेश जाँदा कस्तो तयारी गरी जानुपर्छ? स्वदेशमा कस्ता–कस्ता रोजगारीका सम्भावनाहरु छन्? कस्तो सिप भयो भने स्वदेश र विदेशमा सहज रोजगारी पाइन्छ? बिक्न र टिक्न सकिन्छ? भन्ने र रोजगारको क्षेत्रमा आउनसक्ने समस्या न्युनिकरण गर्न सहयोग पुग्ने बैदेशिक रोजगार बोर्डका कार्यकारी निर्देशक डा.द्धारिका उप्रेतीले बताउनुभयो।