किसानलाई रामपुरमा मकैको बीउ बितरण

पाल्पा ।

रामपुर नगरपालिकाले कृषकहरुलाई उन्नत जातको मकैको विउ वितरण गरेको छ ।

नगरपालिकाले ५० प्रतिशत अनुदानमा सेतो, पहेलो मकैको विभिन्न जातका विउ कृषकहरुलाई वितरण गरेको हो । यस क्षेत्रको हावापानीमा उत्पादन हुने र कृषकको माग अनुसारका विभिन्न ३ जातका मकैको विउ वितरण गरेको कृषि शाखा प्रमुख नारायण गैरेले बताउनुभयो ।

बिगतमा नियमित बितरण गर्दै आएको मकैको बिउमा यसपटक भने गतबर्ष खडेरीले मकै उत्पादन कम हुनुले किसानलाई ठूलो मात्रामा मकै बीउ बितरण गरेको रामपुर नगरपालिकाका प्रमुख रमण बहादुर थापाले बताउनुभयो । खडेरीका कारण बीउ नै मासिने अबस्था आयो, किसानलाई समयमै राहत होस् भनेर बीउ बितरण गरेका हौ उहाँले भन्नुभयो ।

नगरपालिका भित्रका कृषक र कृषि सहकारी गरि ७ सय १२ जनालाई ८ हजार ८ सय २९ किलो मकैको विउ वितरण गरिएको कृषि शाखा प्रमुख गैरेले बताउनुभयो । कृषकहरुलाई मनकामना ३, अरुण २ र रामपुर कम्पोजिट गरि ३ जातका मकैको विउ वितरण गरिएको गैरेले बताउनुभयो ।

रामपुर नगरपालिकाले खाद्यान्न बीउ ५० प्रतिशत अनुदानमा वितरण कार्यक्रम अन्तर्गत १५ लाख रुपैयाँ बराबरको विउ वितरण गरेको छ । यस भन्दा अगाडी नगरपालिकाले धान, गहुँ सहित लहरे तरकारीको विउ पनि केही रकम सहुलियत अनुदानमा वितरण गरेको थियो ।