जिल्ला प्रहरी कार्यालय मुस्ताङमा “हिरासत पुस्तकालय”
Sabalnews
प्रकाशित मिति :
मंगलबार, फाल्गुन १ २०८०
मुस्ताङ ।
जिल्ला प्रहरी कार्यालय मुस्ताङमा अनुसन्धानको क्रममा हिरासतमा रहने थुनुवाहरुलाई लक्षित गरि हिरासत पुस्तकालय निर्माण गरिएको छ ।
मुद्धा अनुसन्धानको शिलशिलामा थुनुवाहरु हिरासतमा बस्दा मानसिक तनाब ब्यबस्थापनमा सहज होस् भन्ने उद्देश्यले पुस्तकालय स्थापना गरिएको जिल्ला प्रहरी कार्यालय मुस्ताङका प्रहरी नायब उपरीक्षक भोजराज पाण्डेले बताउनुभयो ।
पुस्तकालयमा कानून, ऐन नियम, कथासंग्रह, सामान्य ज्ञान, उपन्यास, प्रहरी गतिबिधि र अन्तर्राष्ट्रिय लेखकहरुका पुस्तकहरु र अन्य विभिन्न बिधाका पुस्तकहरु गरि २२७ थान पुस्तकहरु पुस्तकालयमा राखिएको छ । यस कार्यले कार्यालय तथा मातहत प्रहरी ईकाईहरुमा कार्यरत प्रहरी कर्मचारीहरुलाई डिउटी नभएको अबस्थामा र नेपाल प्रहरीले आब्हान गरेको खुल्ला प्रतियोगितामा आन्तरिक परीक्षामा तयारीको लागि पुस्तकहरुले टेवा पुर्याउने बिश्वास रहेको पाण्डेले बताउनुभयो ।
पुस्तकालयमा रहेका २२७ थान पुस्तकहरु मध्ये १४७ थान विभिन्न बिधाका पुस्तकहरु मुस्ताङका प्रदेश सभा सदस्य माननीय बिकल शेरचनले सहयोग गर्नु भएको हो ।
