वीर अस्पतालमा ओपिडी सेवा आजदेखि बिहान ८ बजेबाट
Sabalnews
प्रकाशित मिति :
सोमबार, साउन १ २०८०
काठमाडौं ।
वीर अस्पतालमा साउन १ गतेदेखि ओपीडी सेवा बिहान ८ देखि दिउँसो ४ बजेसम्म सञ्चालन भएको छ। चिकित्सा विज्ञान राष्ट्रिय प्रतिष्ठान (न्याम्स) ले असार २२ गते साउन १ गतेबाट बिहान ८ बजेदेखि ओपीडी सेवा सञ्चालन गर्ने निर्णय गरेको थियो ।
दूरदराजका बिरामीले अनलाइनबाट टिकट काट्न नसकेपछि सेवा प्रवाहलाई बिहानैदेखि सुरु गरिएको अस्पतालका निर्देशक डा. सन्तोष पौडेलले जानकारी दिनुभयो । बिहानै ७ बजेदेखि टिकट लिने व्यवस्था गरिएको छ, अपराह्न साढे २ बजेसम्म टिकट लिने र स्वास्थ्यकर्मीले बिहान ९ बजेभन्दा अगावै जिम्मेवारी हस्तान्तरण गर्ने व्यवस्था गरिएको डा.पौडेलले जानकारी दिनुभयो ।
शल्यक्रिया सेवा पनि बिहान ८ बजेदेखि नै सुरु गर्न डा. पौडेलले सबै विभाग, युनिट, शाखा र वार्डमा परिपत्र गरेको र बहिरंग सेवा पनि बिहान ९ बजेभन्दा अघि नै सुचारु गरिने व्यवस्था भएको बताउनुभयो ।
वीर अस्पतालमा कार्यरत चिकित्सक, नर्सलगायतका स्वास्थ्यकर्मी र कर्मचारीका लागि ई–हाजिरी अनिवार्य गरिएको छ । ओपीडी सेवाका कर्मचारीहरूको हाजिरीका लागि बिहान सवा ८ बजे र अपराह्न पौने चारबजेको हाजिरीलाई मात्र मान्यता दिइनेछ ।
प्रयोगशालाको सेवा पनि बिहान ७ बजेदेखि नै सुरु हुनेछ । खाली पेटमा जाँच गर्नुपर्ने खालका बिरामीको सहजताका लागि बिहानैदेखि सेवा सुरु गरिएको छ । गत असार ८ गतेदेखि ७ सयवटा जनरल बेड अस्पतालमा निःशुल्क छ ।
तर, न्याम्स अन्तर्गतका केही चिकित्सकले भने यो निर्णयप्रति आपत्ति जनाउँदै आएका छन्। न्याम्सका प्राध्यापकहरूको संस्था फ्याकल्टी डक्टर्स एसोसिएसन (एफडीए) ले विज्ञप्ति जारी गरेर यो निर्णयको विरोध गरेको थियो।
