रामपुरले २ सय कुइन्टल बढी धानको बीउ बितरण गर्दै

पाल्पा ।

रामपुर नगरपालिकाले यस बर्ष किसानलाई अनुदान सहुलियतमा विभिन्न जातको २ सय कुइन्टल बढी धानको बीउ बितरण गर्ने भएको छ ।

बर्खासमयमा रोप्ने धानको बिउको लागि नगरपालिकाले गत चैतमा किसान संग निबेदन माग गरेको थियो । सोही निबेदनको आधारमा नगरपालिका कृषि शाखामा आएका किसान, कृषि समूह र कृषि सहकारी मार्फत धानको बीउ बितरण गर्न लागिएको नगरपालिकाका प्रमुख प्रशासकीय अधिकृत लेखनाथ न्यौपानेले बताउनुभयो ।

यस भेगमा जेठ तेस्रो सातादेखि मसान्तसम्म बिउको बियाड राख्ने गरिन्छ । सोही समयलाई मध्यनजर गर्दै बीउ बितरण गर्ने नगरपालिकाले जनाएको छ । ५० प्रतिशत अनुदानमा किसानको मागका आधारमा नगरपालिकाले ५ हजार ६ सय किलो सावा मनसुली, १ हजार ९१ किलो रामधान र १३ हजार ६ सय ४५ किलो सावित्री धान गरि २ सय ३ कुइन्टल ३७ किलो धानको बीउ बितरण गर्ने रामपुर नगरपालिका कृषि शाखा प्रमुख रामहरी पाण्डेले जानकारी दिनुभयो ।

“किसानको माग अझ धेरै थियो, प्रमुख पाण्डेले भन्नुभयो- नगरपालिकाको बजेट र व्यबस्थापन थेग्न सक्ने गरि किसानलाई धानको बीउ बितरण गरिन लागेको हो । जेठ दोस्रो सातादेखि बीउ धान बितरण गर्ने उहाँले बताउनुभयो ।
रामपुर नगरपालिकाका कृषक, कृषि समूह र कृषि सहकारी गरि ४ सय ३८ वटा सो अबधिमा किसान,समूह र सहकारी मार्फत शाखामा निबेदन दिएका थिए । समूह र सहकारीमा आवद्ध किसान समेत गरि १ हजार ४१ जना लाभग्राहीले अहिले सहुलियतमा धानको बीउ पाउनेछ्न् ।

नेपाल सरकारले नापजाच गरि गुणस्तर मापदण्ड पूरा गरेका सस्था मार्फत तोकेको मापदण्ड अनुसार धानको बीउ ल्याईएको हो । उत्पादन बढाउन उन्नत जातको बीउ सहयोग अन्तर्गत मापदण्ड पूरा गरेका रुपन्देही र नवलपरासी जिल्लाका तोकिएका केन्द्रबाट धान ल्याइएको हो ।