प्रदेश सरकारद्धारा निर्मित पक्की पुल उद्घाटन, अब प्रदेशको उपलब्धि देखिन थाल्यो–मुख्यमन्त्री गिरी

पाल्पा । 

लुम्बिनी प्रदेश सरकारले पाल्पाको पुर्व क्षेत्र निस्दीखोलाको २ स्थानमा निर्माण गरेको पक्की पुलको उद्घाटन भएको छ ।

पाल्पा जिल्लाको रामपुर नगरपालिकामा निर्माण भएको मसानेघाट मोटरेवल पक्की पुल र निस्दी र पुर्वखोला जोड्ने रेचेघाटमा निर्माण भएको पक्की पुलको उद्घाटन भएको हो ।

मसानेघाटमा निर्मित पक्की पुलको उद्घाटन गर्नुहुदै लुम्बिनी प्रदेशका मुख्यमन्त्री लिला गिरीले प्रदेश सरकारले केही गरेन, संघीयतामा प्रदेश सरकारप्रति प्रश्न गर्नेहरुलाई राजनितिक परिवर्तनपछि तत्काल परिवर्तन नहुँने र यसको विस्तारमा प्रदेश सरकार जोडतोडले लागेको बताउनुभयो । संविधानमा उल्लेख अधिकारको बाँडफाँडमा अझै बाझिएको बताउदै उहाँले तत्काल भन्दा पनि महत्वपुर्ण विकासका माध्यमबाट जनताको जिवनस्तर उक्कास्न प्रदेश सरकारले महत्वपुर्ण भुमिका खेलेको बताउनुभयो । लुम्बिनी प्रदेशले तराई पहाडमा उत्तिकै विकासलाई प्राथमिकता दिएको छ, गिरीले भन्नुभयो–रामपुर रोल्पा हुदै कर्णाली प्रदेशको कपुरकोट जोड्ने प्रदेशको गौरवको योजनाले रामपुरलाई जोडेको छ । रामपुर बसपार्क, सडक र नाली, सिंचाईकुलो लगायतको काममा सदैव प्रदेश सरकारले काम गरेको उल्लेख गर्दै उहाँले बाटो र पुल बनाएर मात्र नभई अब गाउँ ठाउँ बस्तु र उत्पादन शहर पु¥याउन आधुनिक कृषिलाई प्राथमिकता दिदै अन्य आम्दानीको स्रोत बढाउन स्थानीय लाग्नुपर्ने बताउनुभयो ।

रेचेघाटको पुल उद्घाटन गर्नुहुदै लुम्बिनी प्रदेश सरकारका भौतिक पुर्वाधार विकास तथा शहरी विकास मन्त्री चेतनारायण आचार्यले निस्दी र पुर्वखोलाबासीलाई रेचेघाटको पुल कोशेढुङा हुने बताउनुभयो । हजारौ रुपँयाले खोलाबाट मोटरसाइकल तारेर ज्यान जोखिममा पार्दै वारपार गर्ने स्थानीयलाई पुल बनेर ठुुलो राहत मिलेको उहाँले बताउनुभयो । पुल छैन गाडी चल्दैन भनेर उत्पादन गर्न चाहाना नगर्ने र बोकेर लान नसक्नेलाई अब उत्पादन बढाउन र विकासका काम गर्न सजिलो हुने बताउनुभयो ।

पाल्पा क्षेत्र नम्बर १ का प्रतिनिधि सभा सदस्य नारायण आचार्यले निस्दीखोलामा निर्माण सम्पन्न २ पुलले स्थानीय जिवनशैलीमा निकै सुधार गर्ने बताउनुभयो । गल्धाफाँटमा पनि टेण्डरको प्रक्रियामा रहेको उल्लेख गर्दै आचार्यले रामपुर, निस्दी, पुर्वखोला सहित नवलपुर र नवलपरासी जिल्लाका नागरिकलाई आउन जान सवारी साधन नियमति चलाउन निस्दीखोलाका पुल महत्वपुर्ण हुने बताउनुभयो । छिटो पुल निर्माण गरेकोमा निर्माण कम्पनीलाई धन्यवाद दिनुभयो । उहाँले रामपुर सहलकोट हुँदै झ्यालबास सडकखण्ड ४० करोड टेण्डर भई काम भइरहेकोमा पाल्पा तर्फ ३२ किलोमिटर र नवलपुरतर्फ २५किलोमिटर रहेको उल्लेख गर्नुभयो ।

लुम्बिनी प्रदेश सभा सदस्य राजु प्रसाद श्रेष्ठले प्रदेश सरकारले पाल्पाको पुर्व भेगमा धेरै उल्लेख्य काम गरेको बताउनुभयो । पछाडी परेको यो क्षेत्रलाई अघि बढाउन र जनतालाई सहज बनाउन संघ र प्रदेशले धेरै योजना ल्याएको छ उहाँले भन्नुभयो–केही योजना सकिने चरणमा रहेको छ भने केही प्रक्रियामा र केही प्रस्तावलाई अघि बढाइएको छ । रामपुर खोप्टार रातोढिक सहलकोट झ्यालबास सडक स्तरउन्नतिको प्रक्रियामा रहेको बताउनुभयो ।

मुख्यमन्त्री कार्यालयका सचिव राजेन्द्र थापाले सबैको साथले यी पुल सहज रुपमा समयमा नै निर्माण सम्पन्न भएको बताउनुभयो । लुम्बिनी भौतिक पुर्वाधार विकास मन्त्रालयका सचिव इन्जिनियर अमृत श्रेष्ठले निकै आबश्यक ठाउँमा पुल बनेको बताउदै यसको निगरानी संरक्षणमा स्थानीयले चासो राख्नुपर्ने बताउनुभयो ।

भौतिक पुर्वाधार विकास मन्त्रालय लुम्बिनी प्रदेशका निर्देशक भिमार्जुन पाण्डेले निर्माण व्यवसायीले समयमा थोरै लागतमा काम गरेर उदाहरणीय कार्य गरेको बताउनुभयो । सडक पुर्वाधार कार्यालय पाल्पाका प्रमुख अरुण गुप्ताले पुलको विस्तृत प्रतिबेदन प्रस्तुत गर्दै मसानेघाट र रेचेको २ लेनको २ स्पान सहितको निर्मित पुल एकै किसिमको बनेको बताउनुभयो ।

रामपुर नगरपालिका वडा नम्बर १ पन्थे र ३ किर्तिपुर जोड्ने निस्दीखोलामा ७ करोड, ७३ लाख ६ हजार ७ सय ७१ रुपँया लागतमा निर्माण भएको हो । २०७६ साल फागुन ११ गते सम्झौता भएको पुल सोही बर्ष चैत १६ गते शिलान्यास सँगै निर्माण शुरु भएको थियो । इलाईट कन्ट्रक्सन काठमाडांैसँग ८ करोड १२ लाख २५ हजार ६ सय ४३ मा पुल निर्माणको सम्झौता भएकोमा कम मुल्यमा निर्माण सकिएको हो । निर्माण व्यवसायी शिव श्रेष्ठले बिचमा केही समय समस्या आएपनि सरोकारवालाको सहयोगबाट समयमा नै निर्माण सम्पन्न गर्न सकेको बताउनुभयो । ७० दशमलब ९ मिटर लम्बाई पुल निर्माण भएको हो । पुल निर्माणमा जग्गादान गर्नुहुने दाता रामपुर ३ का काशीराम खनाल र हेम ब कार्कीलाई करुवा, दोसल्ला र प्रशंसा पत्रले मुख्यमन्त्रीले सम्मान गर्नुभएको छ ।

जग्गादाता काशीराम खनाल सम्मानित

पाल्पा जिल्ला समन्वय समिति प्रमुख टंकनाथ खनालको अध्यक्षता लुम्बिनी प्रदेशका निर्वतमान प्रदेश सभा सदस्य युवराज खनालको स्वागत तथा रामपुर नगरपालिका वडा नम्बर ३ का वडाध्यक्ष दामोदर पाठकको सञ्चालनमा कार्यक्रम भएको हो ।

४६.८५ मिटर लम्बाई रहेको रेचेघाटको पुल जयनेपाल ईश्वर विवेक एण्ड कुवेर निर्माण सेवा प्रालि स्याङजाले सम्झौता भन्दा थोरै ३ करोड ७६ लाख ४ हजार ८ सय ३८ रुपँयाको लागतमा निर्माण भएको हो । ३ करोड ८९ लाख ६ हजार ३ स ८४ रुपयाँमा सम्झौता भएको थियो । २०७७ साल असार ३० गते सम्झौता भई पुष ५ गते निर्माण शुरुभएको पुल २०७९ साल असार १८ गते निर्माण सम्पन्न गरेको हो ।
जिल्ला समन्वय समितिका संयोजक टंकनाथ खनालको अध्यक्षता तथा निस्दी वडा नम्बर ६ का वडाध्यक्ष मेख बहादुर सुनारीको संचालनमा कार्यक्रम भएको हो ।