विमान दुर्घटनाको शोकमा सोमबार सार्वजनिक बिदा, ५ सदस्यीय छानबिन समिति गठन
Sabalnews
प्रकाशित मिति :
आइतबार, माघ १ २०७९
काठमाडौं ।
सरकारले माघ २ गते सोमबार सार्वजनिक बिदा दिने निर्णय गरेको छ । आज बसेको मन्त्रिपरिषद् बैठकले पोखरा विमान दुर्घटना प्रति दु:ख व्यक्त गर्दै सोमबार बिदा दिने निर्णय गरेको सरकारका प्रवक्ता एवं अर्थमन्त्री विष्णु पौडेलले जानकारी दिनुभयो ।
पोखरामा यति एयरलाइन्सको विमान दुर्घटना भएको शोकपूर्ण घटनाका कारण माघ २ मा एकदिन सार्वजनिक बिदा दिने निर्णय गरिएको मन्त्री पौडेलले बताउनुभयो ।
आइतबार काठमाडौंबाट पोखराका लागी उडेको यति एयर प्रालिको एनवाईटी–६९१, ९एन–एएनसी विमान १० बजेर ५० मिनेटमा पोखरा टावरसँग सम्पर्कपछि दुर्घटना भएको थियो ।
पोखरा महानगरपालिका–१७ घारिपाटन स्थित सेतीको खोँचबाट ४० जनाको शव निकालिएको प्रहरीले जनाएको छ । विमानमा ६८ यात्रु सवार थिए ।
यसैबीच, सरकारले विमान दुर्घटनाको छानबिन गर्न ५ सदस्यीय छानबिन समिति गठन गएको छ । समितिले ४५ दिनभित्र प्रतिबेदन बुझाउनुपर्नेछ ।
