नागरिकता विधेयक २०७९ राष्ट्रिय सभाबाट पारित हुन कम्तीमा एक साता लाग्ने
Sabalnews
प्रकाशित मिति :
मंगलबार, भाद्र ७ २०७९
काठमाडौं ।
नेपालको नागरिकता (पहिलो संशोधन) विधेयक २०७९ राष्ट्रियसभाबाट पारित हुन कम्तीमा एक साता ढिलो हुने भएको छ।
प्रतिनिधिसभामा राष्ट्रपति विद्यादेवी भण्डारीले पुनर्विचार गरियोस् भनेर फिर्ता पठाएकोमा पारित भएको थियो । राष्ट्रिय सभाको बैठक आगामी भदौ १२ गते मात्र बोलाइएको छ । उक्त विधेयक राष्ट्रिय सभाको बैठक ६ दिन पर धकेलिएसँगै त्यसलाई अघि बढाउने प्रक्रिया ढिलो हुने भएको हो ।
राष्ट्रिय सभाको सोमबारको बैठक शनिबार राति निधन हुनुभएका नेपाली कांग्रेसका नेता एवं प्रतिनिधिसभा सदस्य प्रदीप गिरिको निधनप्रति शोक प्रस्ताव पारित गरेर सकिएको थियो । प्रतिनिधिसभाको बैठक भने मंगलबार नै बस्दैछ ।
राष्ट्रपतिसमक्ष दुवै सदनले पारित गरेको नागरिकता विधेयक यसअघि गत साउन १४ गते प्रमाणीकरणका लागि पठाइएको थियो। राष्ट्रपतिले पुनर्विचार गर्न भन्दै गत साउन २९ गते संसदमा नै फिर्ता पठाउनुभएको थियो ।
राष्ट्रपतिले नागरिकता विधेयकको संवेदनशीलतालाई औंल्याउँदै केही पक्षमा पुनर्विचार गर्न पठाएकोमा प्रतिनिधिसभाले भदौ २ गते जस्ताको तस्तै पारित गरेको थियो।
