ट्रकमा चढेर सहचालक कुट्न खोज्ने युवकको खसेर ज्यान गयो
Sabalnews
प्रकाशित मिति :
मंगलबार, साउन ३१ २०७९
पाल्पा ।
सिद्धार्थ राजमार्ग अन्तर्गत तानसेन-बुटवल सडक खण्ड अन्तर्गत तानसेन जरेपिपलमा ट्रकमा चढ्ने क्रममा खसेर एक जना युवकको ज्यान गएको छ ।
मृत्यु हुनेमा तानसेन ८ जरेपिपलका २५ वर्षिय विक्रम श्रेष्ठ रहेका छन् । जन्मदिन मनाएर मापसे गरी श्रेष्ठ सहित केही युवा राती सडकमा सुतिरहेकोमा सडक छाड्न पठाउदा नमानेर कुट्न ट्रकमा चढ्ने क्रममा खसेर उनको ज्यान गएको हो ।
गएराति झण्डै साढे १२ बजे बुटवलबाट तानसेन तर्फ आईरहेको ग १ ख १०१५ नम्बरको ट्रकले बाटो छाड्नको लागि हर्न बजाउने क्रममा उनीहरु उठेर सहचालकलाई कुटपिट गर्न ट्रकमा चढ्ने प्रयास गरेको प्रहरीले जनाएको छ ।
सोही क्रममा ट्रक बाट लड्दा घाइते भएका श्रेष्ठको
लुम्बिनी मेडिकल कलेज प्रभासमा उपचारको क्रममा निधन भएको जिल्ला प्रहरी कार्यालय पाल्पाका प्रवक्ता प्रहरी निरिक्षक गौतम बोहोराले जानकारी दिनुभयो ।
प्रहरीले ट्रक र चालकलाई नियन्त्रणमा लिई घटनाको अनुसन्धान गरिरहेको जनाएको छ ।
