एन्फाको बैठक आज बस्दै, पटक-पटक स्थगित बैठकमा आज के होला?
Sabalnews
प्रकाशित मिति :
बिहिबार, साउन २६ २०७९
काठमाडौं ।
दुई पटक स्थगित भइसकेको अखिल नेपाल फुटबल संघ (एन्फा) कार्यसमितिको बैठक आज बस्दैछ ।
बिहान १० बजे एन्फाको मुख्यालय सातदोबाटोमा बस्ने बैठकमा पदाधिकारी भागवण्डाको बिषय पनि रहेको छ । पटक- पटक सारिएको बैठकमा आज २२ एजेन्डा छन् ।
यसअघि दुई पटक डाकिएको बैठक स्थगित भएको थियो । साउन पहिलो साता नै २ बैठक बोलाइएकोमा अध्यक्ष पंकजविक्रम नेम्बाङ अस्वस्थ भएपछि पहिलो बैठक स्थगित गरिएको थियो भने दोस्रो बैठक पनि स्थगित भएको थियो ।
पछिल्लो समय पदाधिकारी भागबन्डा नमिल्दा बैठक स्थगित हुँदै आएको टिप्पणी छ । ६ असारमा निवर्तमान अध्यक्ष कर्माछिरिङ शेर्पालाई ६ मतले पराजित गर्दै अध्यक्षमा निर्वाचित हुनुभएका नेम्बाङ आफ्नो चुनावी अभियानमा सहयोग गर्नेलाई खुशी पार्ने मनसायमा रहनुभएको छ। आफू अनूकुल महासचिव, कोषाध्यक्ष र अन्तर्राष्ट्रिय सम्बन्ध प्रमुख नियुक्त गर्नुभएको छ ।
चुनावमा सहयोग गरेका पूर्वअध्यक्ष गणेश थापा र जर्मन नागरिक नविन पाँडेबीच असन्तुष्टि बढ्दै जादा अध्यक्ष चेपुवामा परेको बताइएको छ। पछिल्लो समय समितिका१९ मध्ये १३ सदस्यले हस्ताक्षर गरेर नै अन्तरराष्ट्रिय विभाग प्रमुख पाँडेको बर्खास्तीको माग गरेका छन् ।
आजको बैठकमा यसतर्फ ध्यान जाने बताइएको छ । प्रवक्ता सहित तीन सहमहासचिव, मानार्थ अध्यक्षको नियुक्त गर्नुपर्नेछ । यस्तै, महिला साफ आयोजनाको बिषय समेत मुख्य रहेको छ ।
